Útil para Galiza, útil para a nosa comarca

A nosa comarca –Ferrolterra, Eume e Ortegal– foi obxecto de especial atención no traballo político e nas iniciativas do BNG no Congreso dos Deputados desde que o BNG ten representación, pero especialmente no período dos últimos catro anos.

Podemos dicir, sen temor a equivocarnos, que ningún problema relacionado cos sectores económicos da
nosa comarca, coas infraestruturas de comunicación –nomeadamente, a situación dos camiños de ferro–, coa situación do noso patrimonio cultural e histórico-artístico... estivo á marxe do importante traballo desenvolvido polo BNG, personalizado na figura de Francisco Jorquera.

Precisamente, o feito de estar vinculada esta comarca moi directamente con decisións do goberno central (veto á construción naval, decreto do carbón, abandono das infraestruturas de comunicación, retraso no saneamento da ría...) fixo que na axenda de traballo do BNG igurase sempre como prioridade a necesaria iscalización do labor do goberno do estado nesta temática pero, sobor de todo, a definición de iniciativas políticas dirixidas a cambiar o actual estado de cousas.

A presenza e o intenso traballo do BNG non só foi quen de desenmascarar aos representantes das forzas políticas estatais electos pola comarca á que traizoaron cos seus votos no Congreso e no Senado, senón que conseguiu tamén que o goberno do estado tivese que adoptar cambios en decisións políticas e mesmo en investimentos en infraestruturas, aínda que logo a materialización prática non fose tal pola falla de vontade política e o incumprimento das dedisións adoptadas en sede parlamentar.

Por iso é tan importante que agora, en momentos nos que se agrava a xa crítica situación socio-económica da nosa comarca, nos que a política neoliberal que practican PSOE no goberno do estado e PP na Xunta ameaza aos dereitos básicos, como o dereito ao traballo ou a uns servizos públicos dignos, nos que se condena a milleiros de mozas e mozos da comarca á emigracion, as mulleres e homes da comarca reforcemos o apoio activo á unica forza política que está, día a día, na defensa dos nosos intereses.

A única alternativa que te defende

Os medios teiman en vendernos que o 20N é cousa de dous. Corren tempos difíciles nos que os grandes partidos teñen demostrado que están ao servizo do grande capital máis que ao dos intereses da cidadanía. Cartos para a banca e desmantelamento do sistema financieiro galego, recurtes sociais no Estado e en Galiza, obstáculos inexplicábeis para o desenvolvemento da industria naval en Ferrolterra... xunto con centos de exemplos máis, conforman o despropósito ao que nos teñen acostumados PSOE e PP.

O BNG é alternativa, a única que defende os intereses de Galiza. O teu voto e o da xente do teu arredor é un voto útil.

San Sadurniño garantirá o acceso a internet de banda larga a todo o territorio por medio de tecnoloxía vía satélite

Secundino García e Roberto Valverde
diante dunhas primeiras antenas instaladas

O Concello de San Sadurniño e a operadora galega de telecomunicacións Minotec, asinaron este martes un acordo de colaboración para facilitar o acceso a Internet de banda larga por satélite aos fogares e empresas situados en zona de sombra doutras tecnoloxías. O satélite permitirá ofertar velocidades de ata 10Mb e posibilitará acceder ás novas canles de televisión e radio que emiten por internet así como a outros contidos interactivos. A alta e a instalación serán gratuítas para os usuarios que nestes momentos non dispoñan de cobertura Wimax ou ADSL. 

O acordo entre o Concello e Minotec ten como principal finalidade levar internet a aquelas zonas onde a actual rede sen fíos non dá chegado. Tal e como reza a publicidade da operadora galega “Se ves o ceo, tes internet”, posto que a nova modalidade de conexión usará como repetidor o satélite Ka-Sat de Eutelsat, o máis potente do mundo para comunicacións civís, lanzado ao Espazo en decembro pasado.

Os fogares e empresas que queiran contratar o servizo poderán elixir conexións que van desde os 6 até os 10 Mb, cun prezo de 39,90 euros máis ive para a tarifa básica. Grazas ao convenio suscrito entre o Concello de San Sadurniño e Minotec a instalación e os equipamentos -unha pequena antena parabólica e un emisor- serán gratuítos naqueles casos en que non exista posibilidade dunha ADSL ou dunha conexión fiable a través da rede Wimax municipal. 

Para darse de alta e reservar unha antena haberá que  chamar ao Concello  (981 490 027) en horario de mañá ou ben a Minotec telefonando ao 900 866 956. A alta e a instalación gratuítas levan aparellada unha permanencia no servizo de 18 meses, a menos que o usuario desexe adquirir o equipo. Nese caso o prezo da alta, a parabólica, o enrutador e a instalación será de 399 euros máis ive.

Pioneiro en Galiza.

San Sadurniño convértese deste xeito no primeiro concello de Galiza no que se ofrece a contratación e a instalación gratuíta do servizo satelital de navegación pola rede. A sinatura do convenio de colaboración entre o organismo municipal e Minotec complementa o labor iniciado polo Concello no anterior mandato, cando se puxo en funcionamento o proxecto Wimax do que hoxe se benefician 356 fogares. Ademais, a conexión a través de satélite garantirá o acceso á rede de áreas illadas ás que até este momento non se lles podía ofrecer ningunha solución técnica viable. 

Tal e como sinalan o Concello e a empresa de telecomunicacións, esta nova fase de ampliación da cobertura de internet contribuirá a que todos os veciños e veciñas entren en igualdade de condicións na Sociedade da Información e do Coñecemento.

Unha illa tamén demográfica

San Sadurniño consegue manter poboación

O INE acaba de publicar o avance dos datos poboacionais a 1 de xaneiro de 2011.  A efectos estatísticos en San Sadurniño somos 3.099 persoas. E dicimos a efectos estatíscos porque desde aquela houbo xente que nos deixou para sempre pero tamén outra que naceu ou que elixiu San Sadurniño para vivir. Dous terzos da nosa poboación está entre os 16 e os 64 anos e somos practicamente o mesmo número de mulleres que de homes.

Son só números, pero números que teñen a súa importancia. Galiza perde poboación e, ademais, seguen producíndose migracións do interior á costa ou, dito doutra maneira, do rural aos maltreitos polos económicos do país. Aquí aguantamos e mesmo subimos. Minimamente, pero subimos. O INE dí que gañamos 1 habitante con respecto aos datos de xaneiro de 2010. Este ínfimo incremento sitúanos xunto con Ares e Narón no exclusivo clube dos concellos da comarca que manteñen o tipo en canto a demografía.

Certo é que a estatística marcha a distinto ritmo que a vida e teremos que agardar até finais deste ano para ver se a tendencia positiva se mantén ou se, pola contra, debemos asumir que cada vez somos menos. No contexto no que nos atopamos, os concellos deben ser dinamizadores sociais e económicos para crear condicións que axuden ao crecemento poboacional, procurando ademais que ese crecemento se produza pola base da pirámide.

Niso andamos traballando desde o BNG de San Sadurniño. Houbo quen dixo logo do 22 de maio que somos unha illa rodeada de gaivotas. Tamén queremos ser unha illa demográfica e exemplo de que o rural ten valor e recursos endóxenos abondos para proporcionarlle a calquera unha vida de calidade.

Suso, deputado de todo o norte

Temos xa un deputado. Este martes votouse na xunta electoral quen serán os nosos representantes no órgano provincial. Á Deputación da Coruña correspóndenlle 31 escanos, dos que o PP obtivo 17, o PSOE 9 e o BNG 5. Ocorre que o pleno das deputacións se nutre dos concelleiros electos en cada partido xudicial e aos de Ferrol e Ortigueira, tócalles achegar cinco en conxunto.

Seguro que xa sabedes os nomes e a distribución: Diego Calvo e Miguel de Santiago por Ferrol e Narón respectivamente, Julio Iglesias e Montse García por Ares e As Pontes, e, por último -aínda que non menos importante- Xesús Soto por San Sadurniño.

A votación dos deputados causou malestar entre algúns históricos populares como o alcalde das Somozas, quen sinalou que non elixir deputados dos concellos  rurais "é unha falta de respecto á zona norte e aos concellos máis pequenos". Non lle falta razón a Candocia, da nosa zona incorporaranse ao pleno provincial  tres depuntados da banda da ría e unha das Pontes, é dicir,  de concellos que pasan con moito dos 5.000 habitantes e mesmo multiplican varias veces esa poboación, como Ferrol e Narón. De Ortigueira e arredores non haberá ningún representante.

Suso Soto é, malia entrar formar parte da oposición, quen aparece como único capaz de elevar ao pleno provincial aqueles asuntos que máis lles preocupan aos concellos que van de Trasancos até o Barqueiro.

A asemblea local aproba a proposta de configuración do novo goberno municipal

A primeira asemblea local do BNG logo das eleccións serviu para analisar uns resultados que situaron San Sadurniño como un dos lugares de Galicia onde o bloque sacou un maior porcentaxe de votos.   Pero a asemblea tamén serviu para dar a coñecer como quedarán distribuídas as concellarías no seo dun goberno enteiramente nacionalista.

Secundino García desvelou que Manolo Varela, Pepe Gudín, Mari Carme Muíño e Suso Soto continuarán traballando nas mesmas áreas que até o momento, aínda que no caso deste último prevese que compatibilice o seu labor municipal con tarefas organizativas. As novas incorporacións, Amparo Calvo e Ana Belén Bereijo, faranse cargo das áreas de Servizos e Medio Ambiente e de Educación e Igualdade respectivamente.

No marco da xuntanza, García Casal destacou que tanto el como os novos concelleiros e concelleiras son "un equipo" no que non haberá diferenzas á hora de tomar decisións. Algo que fixo extensivo ao resto dos membros da candidatura, aos militantes e aos simpatizantes do BNG, a quen convidou a participar activamente no día a día da política municipal e, sobre todo, na detección de necesidades veciñais de cara a darlles unha resposta inmediata.

Ao respecto da distribución das áreas e do aumento do número de concelleiros con responsabilidade no goberno, o alcalde en funcións asegurou que esta circunstancia non suporá un incremento no gasto municipal, posto que se prevé que un dos membros do equipo non perciba compensación económica polo desempeño das súas funcións.

No tocante ao estado organizativo da agrupación local, na asemblea púxose de manifesto que o BNG de San Sadurniño goza dunha excelente saúde. Neste sentido marcouse como un dos obxectivos principais a medio prazo o reforzo da súa estrutura . Da mesma maneira tamén se puxo enriba da mesa a necesidade de continuar informando puntualmente a través do Embloque e das redes sociais tanto da xestión do equipo de goberno como do posicionamento do BNG sobre a política autonómica e estatal neste contexto de crise no que nos encontramos.

A ilusión continúa

Pica na imaxe para agrandala

Logo de tanta alegría nos últimos días, nin sequera tiven tempo de analisar pormenorizadamente os resultados obtidos polo BNG e polos outros partidos que concorrían ás eleccións no noso concello. Tampouco hai moita análise que facer: o PP pagou a renovación e a ausencia dun proxecto definido, o PSOE confiou de máis nas súas posibilidades logo de catro anos ocupando unha concellaría e, por último, un BNG que volve ser depositario da confianza da xente. Fomos a forza máis votada en todas as mesas agás nunha e obtendo en todas unha grande diferenza con respecto aos outros dous partidos.

Maioría absoluta. Sete concelleiros, dous máis que hai catro anos e case o dobre que PP e PSOE xuntos. En total obtivemos 1.282 votos, mentres que o PP recibiu o apoio de 600 electores e o PSOE o de 300. Son números, só iso. Indican o apoio maioritario a unha opción política e tamén nos din que 900 veciños e veciñas prefiren proxectos distintos ao do BNG.  Nos próximos catro anos queremos seguir traballando como até agora procurando ademais gañar a confianza de quen aínda ten prexuízos contra o nacionalismo ou de quen desconfía -a pesar do traballo feito- de que sexamos capaces de gobernar con eficiencia e eficacia un concello que é de todos.

Estamos en tempos difíciles e poden poñerse aínda máis feos. Tócanos gobernar nesa realidade sobrevida e tócanos tamén botarlle imaxinación para que San Sadurniño a note o menos posible. Fai falla que os 2.198 que votamos arrimemos o ombro nun proxecto común ao que tamén se deben sumar os 580 que quedaron na casa.

En calquera caso, grazas a todos e a todas por facer de San Sadurniño un sitio diferente e cun grande futuro.

Adxudicadas obras por valor de 217.000 euros con cargo ao Plan de Obras e Servizos da Deputación e ao Fondo de Compensación Ambiental

As obras prevén reforzar o abastecemento a Cornide

O Concello de San Sadurniño apobou en Xunta de Goberno Local a adxudicación de varias obras incluídas no POS provincial deste ano. Trátase de proxectos de mellora da rede viaria municipal nas parroquias de Naraío e Bardaos, cun investimento superior aos 118.000 euros. O órgano de goberno municipal tamén aprobou a contratación do reforzo da subministración de auga ao lugar de Cornide e a reestruturación do alumeado no fondo de Ferreira.

A Xunta de Goberno Local adxudicoulle a Begasucesga a execución dos traballos incluídos dentro do Fondo de Compensación Ambiental, que este ano se centrarán no aglomerado da pista que une o Centro de Día coa ponte sobre o río Xubia. Estas obras aproveitaranse para soterrar unha segunda canalización de subministración de auga ao núcleo de Cornide, “de forma que se pecha un anel de tubaxes na zona e garántese un servizo máis fiable diante de posibles avarías ou cortes”, tal e como explicou o alcalde, Secundino García. As obras suporán un investimento de 66.000 euros.

Por outra banda, os fondos do POS destinaranse na súa maioría ao adecentamento de distintas vías do noso territorio, especialmente aquelas que comunican co concello da Capela. Desta maneira van investirse algo máis de 63.500  euros en asfaltar as estradas que van desde os núcleos do Castro e da Abelleira até os límites con este concello. Unha pequena partida resérvase para o arranxo dun tramo do camiño novo de Lourido, en Naraío, concretamente entre a Cernada e a volta do Peruqueiro. A empresa Excavaciones Saavedra y López foi a adxudicataria destes traballos que comezarán en breve.

No capítulo da mellora viaria municipal tamén se acolleu ao Plan de Obras e Servizos da Deputación un investimento de case 55.000 euros para o aglomerado da pista entre a Cruz da Raíña e a Bañoca, en Bardaos. Neste caso a empresa adxudicataria foi Proyectos Zenale.

O titular de obras, Pepe Gudín, sinalou que estes traballos “confirman o compromiso do BNG coa mellora das infraestruturas municipais”. O concelleiro e número 6 da candidatura nacionalista ás eleccións do próximo 22 de maio engadiu que “os feitos demostran que as críticas do PP son simples trapalladas, posto que o estado de conservación das principais vías do Concello é excepcional”. Gudín apunta que hai algúns tramos en pistas secundarias “pero importantes igualmente” nos que cómpre facer rebacheos e recuperar o firme “indo pouco a pouco e tendo claras cales son as actuacións prioritarias”.

Alumeado en Ferreira

A última das adxudicacións relacionadas co POS 2011 ocuparase do aforro enerxético e da mellora do alumeado público na parroquia de Ferreira. Trátase da unificación do sistema de alumeado público coa instalación de máis puntos de luz, de redutores de fluxo, a sustitución de cadros e cableado e a colocación dun único contador que controle os consumos conxuntos dos alumeados de Pontellas, a Camba, a Castiñeira, a Seara e a Vila.

“Imos modernizar o alumeado para simplificar o seu mantemento e tamén para conseguir unha baixa na factura da luz que pode chegar ao 40 por cento”, explicou Pepe Gudín. Esta inciativa, na que se investirán algo máis de 33.000 euros, forma parte do programa de aforro enerxético emprendido polo goberno local hai xa dous anos, a través do que se está reciclando a práctica totalidade dos alumeados públicos municipais.

O Concello continúa coa posta en valor das zonas incluídas na Rede Natura 2000

Os cauces dos ríos Xubia e Castro teñen a cualificación de Lugar de Interese Comunitario polo seu alto valor ambiental. Ademais o Castro está incluído xunto co monte Forgoselo dentro da Rede Natura 2000. Un espazo de grande riqueza natural que, pouco a pouco, vai contando con máis equipamentos que permitan comprender a súa importancia.

Unha das últimas actuacións municipais busca dar a coñecer mellor a paisaxe e a natureza do val formado por este río ao seu paso por Igrexafeita e Naraío. Por esta razón acondicionáronse dúas áreas de descanso na parroquia de Igrexafeita, unha ao pé da rotonda da autovía e outra no lugar da Pena da Meda. A grandes trazos as obras consistiron na preparación de zonas con céspede, mesas e papeleiras que irán acompañadas de paneis explicativos sobre a flora, a fauna e as formacións xeolóxicas que se divisan desde ambos puntos.

As áreas de descanso do Camiño Grande e da Pena da Meda contan cun orzamento de 55.000 euros. A maior parte destes cartos investíronse na Pena da Meda xa que, segundo explica o concelleiro de Obras “houbo que facer importantes traballos de limpeza e de movemento de terras debido a que era unha zona moi degradada que mesmo se empregaba como vertedoiro incontrolado”. Pepe Gudín asegura que se lle deu “un cambio radical” a un espazo que agora posúe mesas, bancos, unha pasarela de madeira e unha canalización das augas da choiva que, co tempo, “se acabará integrando na área coma se fose un regato natural”.

Arranxo do camiño do Batán a Vilarbó

A outra grande actuación en relación coa posta en valor das ribeiras do Castro desenvólvese entre os lugares do Batán e Vilarbó, en Naraío. A pista que vai paralela ao río estase amañando cun firme de grava e area “para non facer unha intervención demasiado agresiva nun lugar onde o protagonista é o río e o bosque de ribeira e pola que pasan cada ano centos de sendeiristas”, afirma Gudín.

A obra está orzamentada en 18.000 euros e ten un alcance de algo máis dun quilómetro. Igual que as áreas de descanso de Igrexafeita, a reparación do camiño do Batán a Vilarbó financiouse con cargo ás axudas do Fondo de Compensación Ambiental de 2010.

Volvemos encher... pero desta vez, máis

Este Día das Letras Galegas celebramos o noso mitin central cunha participación que me deixou franca e gratamente sorprendido. Volvemos encher a casa da Cultura, aínda que desta vez ata case facela rebordar. Escollemos esta data por cuestións de axenda de Carlos Aymerich e, sobre todo, pola carga simbólica desta data. Dóenos que se ataque a nosa lingua, esa lingua que eu falo porque quero e porque me peta e porque foi a que mamei desde pequeno. Como seguramente a mamastes case todos vós que ledes estas letras.

Tamén me doe que o PP de San Sadurniño se empeñe en usar o castelán nos folletos electorais e nas megafonías cando a meirande parte dos seus candidatos son galegofalantes. Alá eles e elas e a súa estratexia lingüística en tempo electoral que -como veciño e non como candidato nin membro do BNG- me parece errada. Ler programas en castelán asinados por un home coma Plácido -que fala galego de sempre- paréceme pouco crible. En fin, son cousas que non alcanzo a entender.

Volvendo ao tema do mitin, quero agradecervos a todos e a todas as que viñesedes escoitar as propostas do BNG en contraposición cos programas dos outros partidos que concorren canda nós ás eleccións do domingo. Só tedes que comparar. O PSOE fai promesas irrealizables, como levar o saneamento a todas as parroquias cando o seu candidato sabe -ou debería saber- que un estudio municipal cifra en 16 millóns de euros o investimento necesario. Tamén promete destinar o Pazo da Marquesa, entre outros, a usos hostaleiros. O PSOE sabe -ou debería saber- que a acta de cesión do edificio obriga ao Concello a destinar o pazo a usos públicos e entre eles non se conta a hostalaría.

O PP tamén fai propostas interesantes, como a de recuperar a Festa da Familia. O churrasco para todos pagado con fondos municipais non é o que necesita San Sadurniño. San Sadurniño precisa xente ilusionada que faga un traballo digno, tal e como sinalou no mitin Carlos Aymerich. Un equipo serio que xa leva catro anos abrindo o concello ás persoas e que se quere comprometer de cara ao futuro. Por iso, tamén aproveito estas letras para, unha vez máis, pedirche que volvas confiar no BNG e no seu proxecto.

Ao PP galego non lle saen as contas

La Voz de Galicia publicou o domingo a última sondaxe antes das eleccións. Os datos non lle son nada favorables ao PP. Parece que  presidencialismo estéril de Feijoo e a oposición pasiva de Rajoy non van render os réditos electorais agardados. 

O xornal xa demostrou noutras ocasións de que pé coxea e por iso creo que a enquisa estaba cociñada, é dicir, maquillada primeiro e interpretada despois para dúas cousas: que non se note  que o PP non está tan á alza como cre e, por outra banda, para tentar lanzar unha mensaxe que aguilloe os indecisos en tan só unha semana. 

Segundo os datos suavizados intencionadamente por La Voz, o PP non conseguiría a alcaldía en ningunha das sete grandes cidades de Galicia, a pesar que que o xornal se empeñe en poñer titulares desde a óptica dos intereses do PP, como no caso de Pontevedra "El PP a solo un concejal de la mayoría absoluta" cando o titular debera ser "El BNG sube dos concejales y se afianzaría en el gobierno municipal".

En fin, estamos afeitos a que a estas manobras da prensa coruñesa. Nunha cousa teñen razón: hai que moverse e ir votar o domingo. Quen estea indeciso e queira unha alternativa sólida, que vote polo BNG.

O Concello axúdalle ao Naraío a restaurar o seu campo de fútbol

O Concello achegaralle 15.000 euros ao Naraío

Secundino García e Manuel Ángel Vigo -presidente da UDC Naraío- rubricaron recentemente o convenio mediante o que o Concello e a entidade deportiva se comprometen a colaborar na organización de actividades e na mellora das instalacións durante este ano 2011. O convenio suporalle ao Naraío unha achega económica de 15.000 euros que se destinarán a financiar parte da restauración do campo de xogo. A cambio, o Concello contará coo apoio técnico e coas instalacións do equipo naquelas iniciativas de tipo deportivo que leve a cabo.

A Unión Deportiva e Cultural Naraío é unha das entidades con máis traxectoria do eido asociativo de San Sadurniño. O ano que vén faranse os 40 anos da súa fundación e durante este tempo foi quen de manter case ininterrompidamente un equipo de fútbol nas competicións comarcais. Durante este tempo, o Naraío tamén foi capaz de ir mellorando as súas instalacións gracias á implicación veciñal e hoxe dispón dun recinto completamente equipado para usos deportivos, sociais e culturais.

Agora o Concello de San Sadurniño e esta histórica entidade acaban de asinar un convenio que pón sobre o papel o compromiso de colaboración entre as dúas partes de cara a fomentar o deporte con proxección de futuro.

O acordo recolle que a UDC Naraío porá a disposición do organismo municipal as súas instalacións e apoio técnico para a organización de actividades e xornadas desenvolvidas pola Concellaría de Deportes. Pola súa banda, o Concello axudará a financiar as obras restauración do terreo de xogo que se están levando a cabo e tamén correrá cos gastos do consumo eléctrico das instalacións.

A Unión Deportiva asumiu o compromiso de conservar correctamente o recinto, de racionalizar o gasto en enerxía e, ademais, continuará responsabilizándose das reparacións e do mantemento do complexo.

Deste xeito, o Concello achegará 15.000 euros en dúas veces: 7.500 logo da sinatura do convenio e outros 7.500 cando a entidade xustifique documentalmente o remate das obras. Na práctica, a axuda municipal cubrirá o 75% do custe dos traballos de levantamento do campo e instalación dun sistema de drenaxe que permita manter o terreo en perfectas condicións durante toda a temporada futbolística. Para cubrir o 25% restante do custo das obras, a UDC ten presentada unha solicitude de subvención á Deputación Provincial da Coruña.

O alcalde sinalou que a sinatura do convenio “supón un apoio decidido ao deporte asociativo ao tempo que se aumentan os equipamentos dos que o Concello pode dispoñer para levar a cabo actividades”. Secundino García engadiu que o acordo suscrito coa UDC Naraío “salda unha débeda histórica coa entidade e abre novas vías de cooperación en igualdade de condicións con outras organizacións deportivas, como o clube de fútbol San Sadurniño ou o Aldebarán de voleibol, que en conxunto recibirán este ano 30.000 euros”.

San Sadurniño xa ten números

O Concello recibiu máis de 1.200 solicitudes
do azulexo co novo logotipo

A numeración de todos os núcleos de poboación do concello foi un dos traballos máis complexos que se desenvolveron no noso concello nos últimos anos. Un traballo que agora está na súa última fase: a de que a xente luza ben á vista o seu flamante número. Desde primeiros deste mes e até o 1 de xuño, quen teña encargado o seu azulexo pode pasar recollelo no Concello polo prezo simbólico de un euro. En total houbo 1.200 solicitudes e nestes días estanse rexistrando máis peticións, o que fai prever que esta cifra aumente considerablemente. E é que ninguén quere quedar sen esta placa cerámica que, ademais de numerar, nos identifica un pouco máis como territorio.

O proceso de numeración é o cabo dunha iniciativa do goberno do BNG que comezou coa sinalización de todos os lugares de San Sadurniño. Tiñamos 100 quilómetros cadrados de territorio e 191 núcleos con moitos indicadores de dirección e moi poucos de situación. Hoxe calquera sabe onde está en cada momento porque hai cartaces á entrada e á saída de cada núcleo e planos de situación en todos os accesos ao concello. “En San Sadurniño case non hai maneira de perderse”, asegura Secundino García.


Unha vez que os núcleos estiveron identificados e cun nome normalizado pola Universidade de Santiago, só faltaba por darlle número ás casas. Unha idea simple -e unha obriga- á que ningunha corporación anterior lle dera resposta malia as reiteradas queixas veciñais polos problemas que causaba no reparto postal.


O labor de campo atopou que en San Sadurniño hai 1.954 edificacións entre as vivendas que están habitadas, as deshabitadas ou en ruínas e os edificios municipais. Os datos recopilados serviron para xeoreferenciar cada construción e para actualizar a cartografía municipal. E tamén para darlle a cada casa un número que se lle comunicou a todos os propietarios dos que se tiña constancia catastral.


A partir de aí a cousa xa foi máis doada. O goberno local lanzou unha campaña para facer unha compra conxunta de azulexos que foi un éxito absoluto, posto que se recibiron 1.200 solicitudes. Quen encargase unha destas placas pode retirala no Concello desde primeiros de maio e polo prezo máis que asequible de 1€. Desde aquela cada vez son máis as casas que locen o seu azulexo co ansiado número.


O alcalde, destacou que o azulexo “ten un deseño moi atractivo no que se inclúe o carballo de sete follas. Á xente gústalle como queda unha vez posto, algo que deixa ben claro que o logotipo municipal está aceptado, que os veciños e veciñas se identifican con el e que o PP non tivo éxito tentando polemizar sobre este tema”. Ademais, Secundino García tamén puxo de manifesto que o azulexo e a sinalización “contribúen a fortalecer a identidade que temos como territorio”.

Pola súa banda, o concelleiro responsable de Desenvolvemento Rural, Manolo Varela, apuntou que agora “será necesario que os veciños modifiquen o seu enderezo nos documentos oficiais incorporándolle os datos actualizados de lugar e número e que llos comuniquen ás entidades como os bancos ou a empresa da luz... mesmo a calquera persoa coa que manteñan unha relación postal”.

Empeza a campaña electoral

Puntuais coma reloxos. Así estivemos hoxe ás 00:00 h. ao pé do Pazo da Marquesa para iniciar a campaña electoral coa tradicional pegada de cartaces.

O mesmo fixo o PP, con quen cadramos e mesmo compartimos cola nun encontro no que, entre risas e bromas, se alentaba unha certa tensión contida coas miras postas en quen sacará máis votos o día 22 de maio.

Quedan xa poucos días. Menos dos que nos parecen e agora si, podemos lanzar a nosa mensaxe de que en San Sadurniño e en Galiza hai futuro. Abonda con depositar a confianza en quen traballou a reo nos últimos catro anos para converter o noso concello nun lugar de referenza en toda a comarca.

O 22 de maio hai que votar por Secundino García, hai que votar polo BNG, hai que votar por San Sadurniño.

Atentos a La Sexta

O programa emitirase o próximo 19 de maio

A fin de semana pasada foi moi axetreada. Andamos cos preparativos da campaña electoral e ultimando proxectos deste mandato que remata. Con todo, hai tempo para todo. Entre outras cousas para pasar un domingo fantástico con Tellado e con dous mediáticos persoeiros que estiveron con el durante a fin de semana: Andreu Buenafuente e Berto Romero.

Fiel á súa promesa de achegarse a Igrexafeita, Buenafuente e o seu equipo presentáronse en Bouzamaior para compartir o estilo de vida de Alfonso agora que está retirado. Xunto co presentador viñeron outras trece persoas entre guionistas e técnicos da produtora El Terrat que a estas horas xa deben andar compoñendo todo o material gráfico que gravaron en San Sadurniño.

O resultado poderemos velo o próximo 19 de maio no programa que emitirá La Sexta 2 a iso das 22'30 e La Sexta ás 00'30 h. Así que... todas e todos atentos!.

Comezan as obras de restauración do Pazo da Marquesa de San Sadurniño

A empresa Guerreiro Somozas iniciou esta semana os traballos de reparación da cuberta do Pazo da Marquesa de San Sadurniño. Estas obras, para as que a Deputación provincial achega 117.000 euros, ocuparanse nas próximas semanas da restauración do tellado respectando ao máximo os elementos arquitectónicos orixinais. O Concello conta ademais con outros 500.000 euros comprometidos polo Ministerio de Cultura para esta anualidade a través dunha subvención nominativa que se asinará en breve. En total vanse investir algo máis de 617.000 euros na restauración da parte histórica do pazo, na que se teñen previsto ubicar as dependencias municipais.

O pazo da Marquesa de San Sadurniño xa parece outro, aínda que haxa tan só uns días que se empezou a traballar nel. A empresa encargada de rehabilitar a cuberta do edificio xa desmestou o xardín interior e retirou parte do tellado. Segundo as primeiras estimacións, o estado da madeira é bo agás naqueles lugares onde houbo filtracións de augas. Levamos unha grande sorpresa porque tanto nós como os técnicos pensabamos que a estrutura de madeira ía estar moi deteriorada. Logo de retirar as parte do tellado atopamos que a maior parte desa estrutura está en perfectas condicións.

Desde o Concello queremos que a rehabilitación do pazo sexa o máis fidel posible ao orixinal, por esta razón estase buscando reaproveitar todos os elementos que se poidan. O proxecto reflicte a necesidade de acometer as obras reutilizando o material existente sempre que sexa posible debido ao seu valor histórico. Madeiras nobles, trabes e mesmo tellas serán retiradas, saneadas e reutilizadas para garantir o respecto á antiga construción.

As obras teñen un prazo máximo de execución de seis meses. Os traballos son, na práctica, a primeira fase de rehabilitación do edificio, posto que xa se está tramitando un convenio de 500.000 euros co Ministerio de Cultura para desenvolver o resto da restauración da parte histórica. A documentación está nestes momentos en Madrid e agardamos suscribir o acordo nuns días de cara a poder contratar o proxecto e as obras antes do remate do ano.

O pazo pasou a ser de titulariedade municipal en novembro do ano pasado, logo da disolución da fundación relixiosa que xestionaba a herdanza da Marquesa de San Sadurniño. No goberno local traballamos na definición dos usos que vai ter o edificio antigo unha vez estea rehabilitado. Na parte histórica prevense ubicar as dependencias municipais, xa que o Concello actual está nun edificio -o convento do Rosario- que é propiedade da Igrexa. Porén,unha vez restaurado, o Pazo terá capacidade para albergar a sede do Concello, o arquivo e outros departamentos municipais. Ademais, a parte máis moderna tamén podería acoller outros servizos, como a Garda Civil, ou Correos... aínda que iso é algo que teremos que definir máis adiante.

Os medios empezan a caldear o ambiente

Intre da entrevista na sede da Cope

A Cope de Ferrol anda estes días entrevistando os candidatos dos distintos partidos ás alcaldías de toda a comarca. Este martes 12 de abril tocoulle a San Sadurniño. Aló fomos Márquez, Plácido e máis eu. Iso si, a emisora citounos a distintas horas para gravar entrevistas separadas con cada un de nós. As condicións, en teoría, foron as mesmas para todos: duración fixada de antemán de acordo co número de concelleiros que ten cada partido, temas parecidos en todas as entrevistas e nada de saber eses temas de antemán para levar máis ou menos preparadas as respostas para non aturullarse. Todo ben, o xornalismo rigoroso é así e non pode haber trato de favor para ninguén. A Cope elixiu esta fórmula en vez dun debate porque, segundo me explicaron, así garántese que todos poidamos aproveitar o tempo que temos asignado.

Falei cunha xornalista moi amable durante uns sete minutos e marchei. Ás sete e media puxen a radio para escoitar como me saíra a entrevista e, non o vou negar, tamén para escoitar atentamente o que dicían os outros candidatos.

Ao candidato do PSOE, cun só concelleiro, déronlle uns tres ou catro minutos para intervir. Tempo no que cualificou como moi positivos estes catro últimos anos e no que a xornalista lle deu a oportunidade de poñer de manifesto logros que, en esencia, foron executados polos concelleiros do BNG. En resume, o representante socialista falou pouco pero ben, sobre todo cando deu a entender que nas municipais a proximidade da xente ao alcalde é un factor ao seu favor durante uns comicios locais.

Tocoulle despois a quenda ao candidato do PP. Aí empecei a notar algo raro. Xa na primeira pregunta e antes de que a xornalista rematase a pregunta, o candidato popular empezou a contestar de forma algo atropelada malia ter diante papeis escritos coa resposta. Quero pensar que os papeis os levou el porque quixo ter unha guía con posibles respostas e non porque soubese as preguntas de antemán.

A entrevista non ten desperdicio polas cousas que o candidato tenta explicar e non consegue. Falou do polígono industrial indicando que "hai que poñelo en marcha". Eu puntualizaría que non hai que poñelo en marcha, o que ten que facer a Xunta é desbloquear o proxecto, meter máis cartos -este ano só 25.000 euros- e empezar a urbanizalo. O polígono púxose a andar xa en 2007 cando suscribimos o convenio coa Consellería de Vivenda e Solo do que resultou un proxecto licitado en 600.000 euros que a Xunta do PP ten gardado nun caixón desde o 2009. Ao candidato non lle tremeu a voz -e na entrevista aprézase o matiz- para dicir que o superdelegado Diego Calvo prometeu o polígono para cando o PP goberne. É dicir, parece que o futuro industrial do noso concello está supeditado ao partidismo popular. Inmediatamente despois de suxerir que o polígono só se fará se hai PP na alcaldía, o candidato decatouse de que estaba metendo a pata e apostillou "e aínda que non cheguemos a gobernar, me supoño que saquemos o polígono adiante". Esperemos que así sexa.

Outra cousa que me chamou a atención do que dixo o candidato popular foi que houbo unha empresa que tiña intención de crear 200 postos de traballo pero que "como estaba o Bloque, deulle para atrás". Máis que que estea o bloque, o que bota para atrás as empresas é a crise da que o goberno do Estado e o da Xunta non nos dan sacado e, unha vez máis, a falta do necesario chan industrial polo que seguimos agardando.

Logo falouse do corredor e, con moita razón, o candidato do PP dixo que se non se fixo aínda "non foi culpa do Concello". É verdade a culpa non é do Concello, é da Xunta, que leva xa dous anos de retraso con esta vía fundamental para o desenvolvemento da comarca.

Os nervios -quero crer- xogáronlle unha mala pasada ao candidato popular. Cando a xornalista lle preguntou polo seu programa de goberno en materia de turismo e cultura, Plácido foi tallante e dixo que a proposta popular é "instalar minidepuradoras" xa que, segundo dí, "se esta tirando o purín polas pistas". Oíndoo, parece que vivamos rodeados de xurro e en calquera caso, supoño que non entendeu a pregunta... porque minidepuradoras de auga residual para fomentar o turismo e a cultura non parece unha proposta demasiado viable. Aínda que, quen sabe que outras ideas novidosas coma estas terá o PP gardadas na manga.

En fin... mellor escoitar o programa enteiro e que a xente valore. Só unha última apreciación. Quedoume a pena de que a min non me fixesen preguntas do mesmo alcance local que as que lles lles formularon aos outros dous candidatos. O Decreto do Carbón e as súas repercusións son de interese para San Sadurniño, pero que Pepe Blanco veña ás Pontes non creo que sexa demasiado trascendente para nós. Tamén é importante o traballo en sostenibilidade que fixemos, pero non é o único: temos un concello aberto á xente, participativo, saneado económicamente, cos mellores servizos sociais de toda a volta, etc... Cuestións polas que a Cope non me preguntou. Son cousas do xornalismo de actualidade.

San Sadurniño contará cun colmear didáctico para promover o coñecemento do mundo das abellas

Intre da sinatura do convenio coa AGA

Hai uns días asinamos  un convenio de colaboración entre o Concello e a Asociación Galega de Apicultura para o establecemento dun colmear didáctico en San Sadurniño. A instalación terá cinco colmeas e estará situada na leira de conservación de froiteiras autóctonas. O colmear, ao que só lle faltan os enxames, será o punto de referenza dos cursos para escolares e adultos que a AGA ten xa programados en colaboración co Concello.

Tal e como sinalou o representante da AGA, Rafael Díaz, o obxectivo primordial do proxecto é “ensinar, sobre todo aos rapaces, o importante labor que desenvolven as abellas nos ecosistemas e tamén incentivar o seu interese polo mundo da apicultura”.

Entre os obxectivos comúns recollidos no convenio destacan o de mostrar cada un dos aspectos físicos e biolóxicos das abellas, achegarlle á xente en que consiste o oficio de apicultor, difundir a apicultura mediante visitas organizadas ás instalacións e realizar prácticas con persoas sen experiencia na materia e que sexan amantes da natureza. De feito, o Concello e mais AGA xa convocaron un curso de iniciación á apicultura para o que se ofertan 20 prazas e ao que se pode acceder inscribíndose no concello. Ademais, esta entidade tamén ten previsto facer o mesmo cos alumnos de secundaria do CPI de San Sadurniño dentro do convenio asinado recentemente entre a ANPA e o Concello.

O acordo suscrito coa Asociación Galega de Apicultura vén sumarse ao traballo levado a cabo na zona do Arboredo Autóctono e da Horta de Conservación de Froiteiras, posto que as abellas son un complemento perfecto para o desenvolvemento natural destas áreas situadas preto do río Xubia. O Concello xa construiu unha estrutura que albergará cinco colmeas e que a zona “está debidamente protexida e afastada do río para que calquera poida camiñar polo paseo fluvial ou polo arboredo autóctono sen ningún tipo de problema”.

A Asociación Galega de Apicultura prevé instalar en breve o colmear e iniciar de inmediato a súa actividade nas instalacións cedidas polo Concello. Esta asociación achegará todo o material de protección e de traballo que se empregue nas visitas e nos cursos que se impartan no apiario. Ademais, toda a produción anual de mel seralle entregada ao departamento de Servizos Sociais para que a distribúa entre as familias máis necesitadas do concello.

Ferrolterra, crise ou decisións políticas?

Manifestación en Ferrol en contra do decreto do carbón

O compañeiro das Pontes Fernando Branco analisa na revista dixital Terra e tempo a histórica desidia de PSOE e PP no goberno do Estado e da Xunta coa nosa comarca. De forma sinxela e accesíbel, o amigo Nandi repasa algúns exemplos do desmantelamento por parte de PSOE e PP do noso tecido industrial e deixa entrever que o paro que nos azouta ten solución mantendo políticas de País e que non todo se lle pode achacar á crise.

Son de sobra coñecidas as cifras de paro que padecemos na nosa Comarca e, tamén, a perda de poboación, en catro anos vai significar un 8% menos no electorado a respecto das anteriores eleccións.

Hai interese en presentar esta situación como algo normal, produto da crise económica, porén, esa desculpa só serve para diluír responsabilidades, cando na nosa comarca vimos padecendo decisións políticas moi concretas, que teñen pai e nai, e que agravan de xeito determinante os efectos que podería producir a crise xeneralizada.

No haber do Goberno do Estado debemos enumerar o veto á construción naval civil, a falta da normativa legal que dote dunha cota as empresas de biodiésel, o decreto do carbón que pende como unha espada de Damocles sobre o noso futuro e, tamén, o reiterado incumprimento nos prazos para o saneamento da Ría (algo que xa anunciaba Fraga para o ano 1995).

Por se non nos chegase co Goberno do Estado, desde a Xunta de Galiza decidiuse derrogar o Concurso Eólico do Bipartito, que supuxo a perda directa de centos de postos de traballo en Mugardos, Fene, As Pontes e As Somozas; e na resolución do Concurso de Centrais de Biomasa, rexeitouse unha opción na nosa comarca a pesares de acadar máis puntos que algún dos aprobados.

Iso si, ámbalas dúas administracións son moi solidarias no retraso das infraestruturas, tanto no que ten a ver co ferrocarril, corredor da costa, solo industrial, etc.

Para edulcorar estas decisións, ou máis ben para facermos trampas ao solitario, somos o paradigma de diferentes plans industriais, cos que levamos case trinta anos e, ao noso pesar, non son quen diversificarnos; pasado o tempo, seguimos sendo nós mesmos, cada vez menos, máis avellentados e con máis paro.

Tan interiorizado temos este proceso, que vemos con normalidade como as forzas políticas estatais votan, sobre o mesmo tema, unha cousa aquí e outra diferente en Madrid, din que polo interese xeral, no que semella nós nunca temos sorte, seica non formamos parte del.

De feito, como aporte autóctono, alentamos a representantes políticos e sindicais que nos explican esta situación con total naturalidade; de xurdir algunha discrepancia, a resposta é de manual,  os nacionalistas son egoístas e fáltalles unha visión global; por exemplo, é normal que o Goberno Central encargue cinco buques a Navantia Cádiz e ningún a Navantia Ferrol, nós xa estamos afeitos!

Podemos seguir pensando que a situación laboral da Comarca é produto da crise, só da crise?

O Concello de San Sadurniño renova o convenio coa ANPA do colexio para a realización de actividades extraescolares

O Concello de San Sadurniño acaba de suscribir o acordo de colaboración coa asociación de pais e nais do colexio público para a realización de distintas actividades durante o 2011. Segundo o documento o organismo municipal achegará 5000 euros para sufragar, entre outras, a festa do Entroido, a do Día das Letras Galegas, o magosto ou as celebracións do Nadal. Desde aquí queremos destacar o magnífico traballo que fai a ANPA do CPI de San Sadurniño e ratificar o compromiso do BNG de continuar apoiando as actividades que desenvolve.

O programa de actividades escolares propostas pola ANPA complétase co festival de fin de curso, a Festa das Caveiras de Cabaza. Ademais de axudar en eventos puntuais, o Concello tamén colaborará economicamente na organización de dous cursos novidosos, un de primeiros auxilios e outro de apicultura para os alumnos e alumnas de 1º e 2º de secundaria. No convenio tamén se recolle expresamente a axuda municipal para as excursións de fin de curso de infantil, primaria e 4º de secundaria.

O convenio materializarase nunha achega de 2.500 euros logo da sinatura, á que se lle sumarán outros 2.500 euros no intre da xustificación das actividades.

O convenio supón un apoio decidido ao magnífico traballo que desenvolve a ANPA do colexio público. Cómpre lembrar que nos últimos anos o organismo municipal e a comunidade educativa manteñen unha estreita relación e un constante diálogo que resultou nunha mellora considerable dos equipamentos educativos e da oferta extraescolar.

Neste mandato, o Concello investiu máis de 600.000 euros no centro. Investimentos que foron para, entre outras obras, a separación do aparcadoiro da área de lecer e a construción de pistas multixogos.

Bolsas escolares

Este 31 de marzo tamén remata o prazo para solicitar as axudas municipais para estudos. Destínanse 20.000 euros a bolsas das que se poderán beneficiar alumnos e alumnas do concello que estuden en centros de dentro e fóra de San Sadurniño e tamén aquelas familias que teñan que botar man dunha gardería. Para o 2011 o concello introduciu cambios para o acceso ás bolsas. De feito, agora revisarase a base impoñible do IRPF de cada familia en vez de tomar como referenza os ingresos brutos. Desta maneira garántese que poidan aproveitar as becas un maior número de familias e, o que é máis importante, que se beneficien delas as que máis o necesitan.

San Sadurniño asina coa Xunta o convenio para a mellora de infraestruturas rurais

Esta mañá asinamos coa Xunta o convenio relativo aos Proxectos Estratéxicos de Infraestruturas no Medio Rural. O coñecido como PEIM é un programa sufragado polo Ministerio de Medio Rural e Mariño e pola Xunta de Galicia, que nesta anualidade prevé investimentos en San Sadurniño por valor de 46.635 euros. Esta partida orzamentaria destinarase á reparación de varias pistas nas parroquias de Lamas, Naraío, Igrexafeita e Ferreira.

A sinatura do convenio produciuse no Centro de acollida de visitantes das Fragas do Eume, en Pontedeume, e a el asistiron outros alcaldes da comarca. O PEIM ten como obxectivo levar a cabo actuacións que axuden a arranxar deficiencias existentes nos concellos, especialmente camiños agrícolas epistas rurais.

No caso de San Sadurniño o Concello presentou un programa de intervencións que reflicte a reparación de tres eixos viarios municipais. Así, resafaltaranse as pistas de Bouzamaior, en Igrexafeita, a que une o núcleo de Quintiá co límite co concello da Capela, en Naraío, e a pista que vai desde o lugar da Praza até o Vidueiro, en Ferreira.

Con cargo ao PEIM tamén se limparán as gavias e se lle botará unha nova capa de rodadura á pista que vai desde a Fontela até a Rega, en Ferreira e melloraráselle o acceso á AC-862 aos veciños e veciñas do lugar de Vilanova, en Lamas.

En total vanse investir neste momento 46.635 euros correspondentes á parte que pón Medio Rural nun programa confinanciado pola Xunta e o Estado. Agora estase á espera de que se dilucide a concreción do financiamento estatal. A San Sadurniño correspóndenlle 139.905 euros dos que, polo de agora, só se lle puido dar saída a un terzo que é competencia da Xunta. Agardamos que en breve o Ministerio dea orde de presentar os proxectos para os outros 93.270 euros que faltan para completar esta anualidade do PEIM.

Fálanos sempre que nos vexas...

Fálame sempre que me vexas. É unha frase que temos empregado centos de veces para saudarmos a quen hai tempo que non vemos. Eu fágoa miña nesta ocasión porque quero que me faledes sempre que me vexades e se non me vedes, tedes unha chea de camiños para contarme o que queirades.

Estamos ultimando o programa de goberno 2011-2015 co que nos presentamos ás eleccións municipais do mes de maio. Por iso é tan importante que nos fagades chegar as vosas inquedanzas. Podedes facelo a través do meu  facebook, polo twitter, neste blog a través dos comentarios e tamén neste enderezo de correo electrónico ao que podedes enviarme calquera proposta ou achega que nos axude a mellorar o noso concello.

Ah, e sempre podedes falarme a min ou a calquera dos membros da candidatura.

O concello máis verde do Estado, segundo os xornalistas

A nova de que eramos o concello máis verde do Estado converteu San Sadurniño nun fervedoiro de medios durante esta semana e maila pasada. Quen dixo tal cousa foi El Correo Gallego e, a partir de aí, o resto. Radio Nacional, Onda Cero, La Sexta, Xornal, Vtelevisión, e TVE, entre outros, xa se interesaron polas políticas que desenvolvemos en materia de sustentabilidade.

Levamos traballado moito, pero é algo excesivo dicir que somos "os máis...". Seguro que hai máis concellos en España que promoveron entre a veciñanza a compra conxunta de paneis solares térmicos. Tamén é seguro que hai centos de vilas con programas de compostaxe caseira. Estou certo de que hai consistorios nos que, igual ca nós, reduciron a factura eléctrica reordenando os alumeados públicos, controlando o que as eléctricas queren cobrar e metendo bombillas de baixo consumo en todos os edificios municipais. Por suposto, creo que haberá moitos concellos nos que a recollida do lixo é tanto ou máis efectiva que a nosa, aínda sendo a de San Sadurniño unha das que ten menos "impropios" de toda Galiza. Ata haberá municipios que aposten pola preservación de especies autóctonas de todo tipo e que promovan o consumo responsable.

Se somos os máis en algo, creo eu, é en que fomos quen de poñer en marcha todas estas medidas en menos de catro anos cunha grande implicación social. Ao longo destes días seguramente vexamos San Sadurniño na televisión varias veces. Avisareivos a través do meu facebook e do do BNG.

Cheo na Casa da Cultura

Non teño outra maneira de titular esta entrada do meu blog. Estou realmente sorprendido por termos xuntado tantos veciños e veciñas no acto de presentación da candidatura para as municipais. Aínda non estamos en campaña, pero si se alentan ventos electorais. Mentres PSOE e PP aínda andan a voltas coa configuración das súas candidaturas, nós xa hai semanas que a fixemos pública e este 23 de marzo convertémola en oficial.

Alguén da oposición dixo non hai moito nun lugar público que xa tiñan a lista feita... Acto seguido convidou a unha das alí presentes a formar parte dela. Insistiu e insistiu e, ao final, levou un rotundo non por resposta. Supoño que será un problema de cumprir coa paridade. Os partidos tradicionalmente "de homes" agora non conseguen facer listas como é debido, é dicir, listas paritarias coma as do BNG na que mulleres e homes están en igualdade de condicións.

Este ano ao BNG foille moi doado reunir unha equipa que, como dixo Sandra Arnosa na presentación, mestura experiencia e xuventude. Vese que o traballo ben feito nos últimos catro anos lle dá impulso á xente para integrarse no noso proxecto. Un proxecto que vai máis aló das persoas que integran a candidatura. Un proxecto de compromiso con San Sadurniño.

Para o acto da presentación preparei unhas letras que me servisen de guía durante a miña intervención. Quería falar da da democratización da vida política neste municipio, do avance dado en materia de servizos e infraestruturas,  da importancia da participación cidadá nas decisións municipais,  das medidas de aforro enerxético, ou do feito de que San Sadurniño sexa -segundo a FEGAMP- o concello de Galiza  que máis destina a servizos sociais en termos porcentuais do seu orzamento. Este ano 2011, o 15% das contas municipais irán parar a benestar social. 

Tamén quería tirarlle das orellas á Xunta de Galiza porque aínda non urbanizou o Polígono Industrial segundo o acordado en 2007 e tamén porque aínda agardamos a construción dunha Escola Infantil nuns terreos que o Concello xa ten cedidos ao Consorcio e para a cal xa está redactado o proxecto.

Quería falar destas e doutras moitas cousas. Algunhas toqueinas, outras non. Xa se sabe como é o directo. Só quero agradecervos que onte a casa da cultura estivese chea.

Contra da lei de augas

A nova lei de augas aprobada en solitario polo PP está a dar que falar en toda Galiza por causa do canon que a Xunta nos quere impoñer. Teremos que pagar un novo imposto sen que a Xunta nos dea nada a cambio. A medida "popular" suporalle unha importante suba da factura aos veciños do casco urbano, xa que á factura municipal haberá que incorporarlle o canon da Xunta.

Poñamos un exemplo práctico collendo un caso real dunha vivenda de San Sadurniño na que viven catro persoas. Nesta casa consomen 75 m3 en catro meses. A factura é de 10,14 euros fixos máis 0,61 euros por metro cúbico. Total: 55,89 euros que cobra o Concello de taxa de subministración.

Pois ben, a eses 55,89 euros vai haber que sumarlle o canon imposto pola Xunta. Botemos contas: unha cuota fixa de 6 euros a maiores polos catro meses, máis 27 euros polo consumo, xa que nos cobrarían outros 0,36 euros por metro cúbico consumido. Total: 33 euros directamente para as arcas da Xunta que, por certo, non se encarga de manter a traída municipal. Así teríamos que a factura dos catro meses pasaría dos 55,89 euros aos 88,89. É dicir, se se mantivese ese consumo todo o ano, na casa do exemplo pagarían case 100 euros máis. 

Estas contas tamén se poden botar no caso dun negocio. Por exemplo, un local hostaleiro de San Sadurniño que gaste 393 m3 no primeiro cuadrimestre do ano pagaría agora uns 250 euros. Co canon da Xunta vería aumentada a súa factura noutros 140 euros sen que a administración lle preste ningún servizo máis aló do que xa vén prestando o Concello. Ao final do ano os números non son unha broma: o canon súbelle a factura da auga 70.000 pesetas das de antes.

O BNG opúxose a esta norma xa no seu debate parlamentario porque non ten ningún sentido cobrar por algo sen ofrecer nada a cambio e tamén porque nos tempos que corren non é momento de cargar as familias con máis impostos. 

O PP anda dicindo por aí que a Xunta non vai cobrar pola auga, pero a lei publicada no DOG di que si se vai cobrar e a lei que está escrita vai á misa. Se é verdade que non van cobrar téñeno moi doado: que borren da normativa o asunto do canon e así quedaremos todos máis tranquilos. 

O bloque xa empezou a moverse contra este imposto abusivo e inxustificado e por iso se recolleron 14.000 sinaturas -500 delas só en San Sadurniño- nas que se lle esixe ao PP que dea marcha atrás nunha medida que pon de manifesto a voracidade recadatoria do Partido Popular á fronte da Xunta. 

21 candidatos comprometidos coa comarca

O BNG quixo  facer patente o seu compromiso con Ferrolterra este xoves cun manifesto “por unha política municipal vertebradora e transformadora”, nun texto que asinamos os 21 candidatos e candidatas ás alcaldías de concellos da comarca.

Tal e como se recolle neste manifesto, o BNG “aposta polo levantamento do veto á antiga Astano e a modificación do decreto do carbón, na liña de garantir a produción enerxética na factoría das Pontes e a defensa dos postos de traballo”.

O BNG aposta polos concellos como factores dinamizadores da economía e isto implica “unha defensa dos sectores produtivos, do pequeno comercio, así como por unha política de fomento do turismo asociado ás potencialidades patrimoniais”. Tamén se recolle neste manifesto, “a necesidade da vía de Alta Capacidade como unha premia básica para garantir o desenvolvemento socioeconómico das comarcas do Eume, Ferrolterra, Ortegal e a Mariña”.

Os concellos como dinamizadores
Nesta situación, o portavoz nacional do BNG, Guillerme Vázquez, indicou que “os concellos poden e deben ser axentes activos fronte ao paro e a precariedade” e advertiu de que “as outras forzas políticas van dicir o mesmo ca nós pero a pregunta que nos temos que facer é se é críbel que as forzas políticas gobernantes en Galiza e en Madrid e causantes desta situación vaian facer unha política diferente ou contraria á que están practicando”.

“Non o van facer”, advertiu o líder do BNG, “actuarán como sucursais” e insistiu na importancia de pensar o que pode facer o PP nos concellos “cando ten un señor presidente da Xunta que di que non pode facer nada fronte ao paro e que nada fai por resolver os problemas dos galegos e galegas. Non van facer nada diferente nos concellos, digan o que digan en campaña electoral”, concluiu.

“Nós sabemos que coa forza da xente hai futuro”, asegurou Guillerme “e esa forza ímosllela pedir humildemente a todos os cidadáns e cidadás de Ferrolterra para poder seguir transformando positivamente a realidade dos nosos concellos”.

Tal e como reiterou o líder nacionalista, o BNG presenta a estas eleccións homes e mulleres “con experiencia política, con traballo contrastado e con proxecto e futuro, persoas que teñen na súa cabeza o proxecto para o seu concello e saben como levalo adiante”.

“Son candidatos e candidatas con vontade de gobernar e con posibilidade de facelo”, continuou Guillerme, ao tempo que asegurou que “estamos seguros de que os cidadáns e cidadás aprecian o labor do BNG, tanto no goberno como na oposición dos concellos”.